---
title: "യു.എ.ഇ​യിലേക്ക്​ എത്തിച്ചേരുന്ന സഞ്ചാരികൾക്ക്​ പുതിയ സംവിധാനങ്ങളൊരുക്കി യു.എ.ഇയിലെ വിമാനക്കമ്പനികൾ"
english_title: "Airlines in the UAE have prepared new systems for travelers arriving in the UAE."
publisher: "gccnews.in"
canonical_url: "https://gcc.truevisionnews.com/news/114691/airlines-in-the-uae-have-prepared-new-systems-for-travelers-arriving-in-the-uae"
published_at: "2023-05-14T13:11:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/646090cb5036b_ETHIHAD.jpg"
keywords: []
---

# യു.എ.ഇ​യിലേക്ക്​ എത്തിച്ചേരുന്ന സഞ്ചാരികൾക്ക്​ പുതിയ സംവിധാനങ്ങളൊരുക്കി യു.എ.ഇയിലെ വിമാനക്കമ്പനികൾ

> **Lead Summary:** **ദുബൈ: **യാത്രാ-ടൂറിസം മേഖലയിൽ ലോകത്തിന്‍റെ ശ്രദ്ധാ കേന്ദ്രമായി മാറിക്കൊണ്ടിരിക്കുന്ന യു.എ.ഇ​യിലേക്ക്​ എത്തിച്ചേരുന്ന സഞ്ചാരികൾക്ക്​ വേണ്ടി പുതിയ സംവിധാനങ്ങളൊരുക്കി യു.എ.ഇയിലെ വിമാനക്കമ്പനികൾ. ദുബൈ ആസ്ഥാനമായ എമിറേറ്റ്​സും അബൂദബി ആസ്ഥാനമായ ഇത്തിഹാദുമാണ്​ ഏറ്റവും പുതിയ സൗകര്യങ്ങളൊരുക്കുന്നതിൽ മുന്നിൽ നിൽക്കുന്നത്​.

## Article Content

**ദുബൈ: **യാത്രാ-ടൂറിസം മേഖലയിൽ ലോകത്തിന്‍റെ ശ്രദ്ധാ കേന്ദ്രമായി മാറിക്കൊണ്ടിരിക്കുന്ന യു.എ.ഇ​യിലേക്ക്​ എത്തിച്ചേരുന്ന സഞ്ചാരികൾക്ക്​ വേണ്ടി പുതിയ സംവിധാനങ്ങളൊരുക്കി യു.എ.ഇയിലെ വിമാനക്കമ്പനികൾ. ദുബൈ ആസ്ഥാനമായ എമിറേറ്റ്​സും അബൂദബി ആസ്ഥാനമായ ഇത്തിഹാദുമാണ്​ ഏറ്റവും പുതിയ സൗകര്യങ്ങളൊരുക്കുന്നതിൽ മുന്നിൽ നിൽക്കുന്നത്​.

രാജ്യത്തെ ടൂറിസം ​മേഖലയെ പ്രാൽസാഹിപ്പിക്കുന്നതിന്​ വിവിധ മേഖലകളിൽ സഹകരിക്കുന്നതിന്​ എമിറേറ്റ്​സും ഇത്തിഹാദും​ ധാരാണപത്രത്തിൽ ഒപ്പുവെച്ചിട്ടുണ്ട്​. യു.എ.ഇ സന്ദർശിക്കുന്ന വിനോദസഞ്ചാരികൾക്ക്​ കൂടുതൽ പ്രദേശങ്ങളിലെത്താൻ അവസരമൊരുക്കുന്നതാണ്​ കരാർ. ദുബൈയിൽ ഇറങ്ങിയ യാത്രക്കാരന്​ അബൂദബി വഴി മടങ്ങാനും, അബൂദബിയിൽ ഇറങ്ങിയയാൾക്ക്​ ദുബൈ വഴി മടങ്ങാനും ഒറ്റ ടിക്കറ്റിൽ സാധ്യമാകുന്ന സംവിധാനമാണ്​ ഇതിനായി ഒരുക്കുന്നത്​.

ഇതുവഴി ഒരു യാത്രയിൽ തന്നെ രണ്ട്​ പ്രദേശങ്ങളും സമയനഷ്ടമില്ലാതെ സഞ്ചരിക്കാൻ അവസരമൊരുങ്ങും. ഇതുവഴി വിനോദ സഞ്ചാരികളുടെ എണ്ണം വർധിപ്പിക്കാൻ സാധിക്കുമെന്നാണ്​ കരുതുന്നത്​. ആദ്യമായാണ്​ ഇത്തരമൊരു ധാരണ ഇരു വിമാനക്കമ്പനികളും ഒപ്പുവെക്കുന്നത്​.എമി​റേറ്റ്​സ്​ വിമാനത്തിൽ യാത്ര ചെയ്യുന്നവരുടെ ബോർഡിങ്​ പാസുകൾ പേപ്പർ രഹിതമാക്കുന്നതിനും ഘട്ടംഘട്ടമായി പദ്ധതി നടപ്പിലാക്കുന്നുണ്ട്​.

ഇതിന്‍റെ ഭാഗമായി ദുബൈ വിമാനത്താവളത്തിലെ ടെർമിനൽ 3-ൽ ചെക്ക് ഇൻ ചെയ്യുന്ന യാത്രക്കാർക്ക് അവരുടെ മൊബൈൽ ബോർഡിംഗ് പാസ് മേയ്​ 15മുതൽ നൽകിത്തുടങ്ങും. ഇ-മെയിലിലോ എസ്​.എം.എസ്​ വഴിയോ ആണ്​ ബോർഡിങ്​ പാസ്​ നൽകുക. ഓൺലൈനായി ചെക്ക് ഇൻ ചെയ്യുന്ന യാത്രക്കാർക്ക് അവരുടെ ആപ്പിൾ വാലറ്റിലേക്കോ ഗൂഗിൾ വാലറ്റിലേക്കോ ബോർഡിങ്​ പാസ് ലോഡുചെയ്യാനാകും.

അല്ലെങ്കിൽ എമിറേറ്റ്സ് ആപ്പിൽ ബോർഡിങ്​ പാസ് ലഭ്യവുമായിരിക്കും. അതിനിടെ അടുത്ത പത്തുവർഷത്തിനകം കാർഗോ ശേഷി ഇരട്ടിയാക്കുമെന്ന്​ എമിറേറ്റ്​സ്​ വിമാനക്കമ്പനിയുടെ കാർഗോ വിഭാഗമായ എമിറേറ്റ്​സ്​ സ്​കൈ കാർഗോ വ്യക്​തമാക്കിയിട്ടുണ്ട്​. ഇതിന്‍റെ ഭാഗമായി 2 ബോയിങ്​ 747-400 എഫ് വിമാനങ്ങൾ പുതുതായി ചേർക്കുകയും പുതുതായി 20 പ്രദേശങ്ങളിലേക്ക്​ കൂടി കാർഗോ സർവീസുകൾ ആരംഭിക്കാനും കമ്പനി പദ്ധതിയിടുന്നുണ്ട്​.

കൂടുതൽ കാർഗോ ഉൾകൊള്ളാൻ സാധിക്കുന്ന നിരവധി വിമാനങ്ങളാണ്​ പുതുതായി അടുത്ത വർഷങ്ങളിൽ ചേർക്കാൻ ലക്ഷ്യമിടുന്നത്​. വിദേശ വ്യാപാരം ഇരട്ടിയാക്കാനുള്ള ദുബൈയുടെ പദ്ധതികളും ഗൾഫ്, പശ്ചിമേഷ്യ, ആഫ്രിക്ക എന്നിവിടങ്ങളിലെ വിപണികളിൽ നടക്കുന്ന സാമ്പത്തിക പ്രവർത്തനങ്ങളുടെ സാധ്യതയും പരിഗണിച്ചാണ്​ എമിറേറ്റ്​സ്​ പുതിയ പദ്ധതികൾ ആസൂത്രണം ചെയ്തിരിക്കുന്നത്​. ഈ നടപടികളെല്ലാം രാജ്യത്തെ ബിസിനസിനും വിനോദ സഞ്ചാരത്തിനും കരുത്തുപകരുന്നതാണ്​.

### Related Links & Sources
- [Original Story Source](https://gcc.truevisionnews.com/news/114691/airlines-in-the-uae-have-prepared-new-systems-for-travelers-arriving-in-the-uae)