---
title: "#uae |യു.എ.ഇയിലെ സാമ്പത്തിക വളർച്ച ഏഴ് ശതമാനമാക്കും; മൊത്ത ആഭ്യന്തര ഉൽപാദനം ഇരട്ടിയാക്കാനും ലക്ഷ്യം "
english_title: "#Economicgrowth in the #UAE will be #sevenpercent"
publisher: "gccnews.in"
canonical_url: "https://gcc.truevisionnews.com/news/132948/economicgrowth-in-the-uae-will-be-sevenpercent"
published_at: "2023-07-23T13:05:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/64bcd867bcbc3_uae.jpg"
keywords: []
---

# #uae |യു.എ.ഇയിലെ സാമ്പത്തിക വളർച്ച ഏഴ് ശതമാനമാക്കും; മൊത്ത ആഭ്യന്തര ഉൽപാദനം ഇരട്ടിയാക്കാനും ലക്ഷ്യം 

> **Lead Summary:** **ദുബൈ: **[വരും വർഷങ്ങളിൽ രാജ്യം സാമ്പത്തിക രംഗത്ത്​ കുതിപ്പിന്​ ഒരുങ്ങുകയാണെന്നും വളർച്ചാ നിരക്ക്​ 7ശതമാനമാക്കുകയാണ്​ ലക്ഷ്യമെന്നും യു.എ.ഇ സാമ്പത്തികകാര്യ വകുപ്പ്​ മന്ത്രി അബ്​ദുല്ല ബിൻ തൂഖ്​ അൽ മർറി. ബ്ലൂംബർഗ്​ ചാനലിന്​ നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

## Article Content

**ദുബൈ: **[വരും വർഷങ്ങളിൽ രാജ്യം സാമ്പത്തിക രംഗത്ത്​ കുതിപ്പിന്​ ഒരുങ്ങുകയാണെന്നും വളർച്ചാ നിരക്ക്​ 7ശതമാനമാക്കുകയാണ്​ ലക്ഷ്യമെന്നും യു.എ.ഇ സാമ്പത്തികകാര്യ വകുപ്പ്​ മന്ത്രി അബ്​ദുല്ല ബിൻ തൂഖ്​ അൽ മർറി. ബ്ലൂംബർഗ്​ ചാനലിന്​ നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

മൊത്ത ആഭ്യന്തര ഉൽപാദനം അടുത്ത വർഷങ്ങളിൽ ഇരട്ടിയിലേറെ വർധിപ്പിക്കാനാണ്​ ലക്ഷ്യമിടുന്നത്​. ഇതുവഴി സമ്പദ്​വ്യവസ്ഥ 2030ഓടെ മൂന്ന്​ ലക്ഷം കോടി ദിർഹമിലെത്തും -അദ്ദേഹം വ്യക്​തമാക്കി.

ക്രൂഡ്​ ഓയിലിന്‍റെ വിലവർധനവും ഉൽപാദനം കൂടിയതും കാരണമായി കഴിഞ്ഞ വർഷം രാജ്യം എട്ടു ശതമാനത്തോളം വളർച്ചയാണ്​ രേഖപ്പെടുത്തിയത്​. എന്നാൽ ഈ വർഷം കുറഞ്ഞ വേഗതയിലാണ്​ മുന്നോട്ടുപോവുകയെന്നാണ്​ അന്താരാഷ്ട്ര നാണയ നിധിയുടെ പ്രവചനം.

ഈ സാഹചര്യത്തിൽ സാമ്പത്തിക മേഖലയുടെ വളർച്ചക്കായി വിവിധ രാജ്യങ്ങളുമായി ഉഭകക്ഷി വ്യാപാരവും സഹകരണവും വർധിപ്പിക്കാനുള്ള ശ്രമത്തിലാണ്​ രാജ്യം. എന്നാൽ ചൈനയിലെ വളർച്ചാ മന്ദഗതി, ആഗോള സമ്പദ്​വ്യവസ്ഥയിലെ തടസങ്ങൾ എന്നിവ വെല്ലുവിളി ഉയർത്തുന്നുണ്ട്​ -മന്ത്രി വിശദീകരിച്ചു. എണ്ണയുൽപാദക രാജ്യങ്ങളുടെ കൂട്ടായ്മയായ ഒപെകിലെ മൂന്നാമത്തെ ഏറ്റവും വലിയ ഉൽപാദകരാണ്​ യു.എ.ഇ. നിലവിൽ വിവിധ പദ്ധതികളിലൂടെ ബിസിനസിന്‍റെയും സാമ്പത്തിക പ്രവർത്തനങ്ങളുടെയും ഒരു ഹബ്ബാക്കി മാറ്റാൻ സർക്കാർ ശ്രമം നടത്തുന്നുണ്ട്​.

ഇന്ത്യ, ഇന്തോനേഷ്യ, തുർക്കി തുടങ്ങിയ വ്യത്യസ്ത രാജ്യങ്ങളുമായി ശതകോടിക്കണക്കിന്​ ഡോളർ മൂല്യമുള്ള വ്യപാര കരാറുകൾ കഴിഞ്ഞ രണ്ടു വർഷത്തിനുള്ളിൽ ഒപ്പുവെച്ചിട്ടുമുണ്ട്​. കഴിഞ്ഞ ആഴ്ചയിൽ മാത്രം ഇന്ത്യൻ പ്രധാനമന്ത്രി നരേന്ദ്രമോദിയുടെയും തുർക്കി പ്രസിഡന്‍റ്​ റജബ്​ ത്വയ്യിബ്​ ഉർദുഗാന്‍റെയും ജപ്പാൻ പ്രധാനമന്ത്രി ഫുമിയോ കിഷിദയുടെയും സന്ദർശന സമയത്ത്​ വിവിധ വ്യപാര കരാറുകളിൽ ഒപ്പുവെച്ചിരുന്നു.

ഇതെല്ലാം രാജ്യത്തിന്‍റെ സാമ്പത്തിക വളർച്ചയെ ത്വരിതപ്പെടുത്തുമെന്നാണ്​ പ്രതീക്ഷിക്കുന്നത്​.റഷ്യ-യുക്രൈയ്​ൻ യുദ്ധത്തിന്‍റെ പശ്​ചാത്തലത്തിൽ ഡോളറിൽ അല്ലാതെ വ്യാപാരം നടത്തുന്നതിന്​ ലോകത്തെ വിവിധ രാജ്യങ്ങൾ ആരംഭിച്ച ശ്രമങ്ങളുടെ ഭാഗമായി ഇന്ത്യയുമായി​ പ്രദേശിക കറൻസികളിൽ വ്യാപാരത്തിനും കരാറിലെത്തിയിരുന്നു​.

ഇന്ത്യക്ക്​ ​ക്രൂഡ്​ ഓയിൽ നൽകുന്ന നാലാമത്തെ ഏറ്റവും വലിയ രാജ്യമാണ്​ യു.എ.ഇ. അതോടൊപ്പം, എൽ.പി.ജി, എൽ.എൻ.ജി എന്നിവ നൽകുന്ന രണ്ടാമത്തെ ഏറ്റവും വലിയ രാജ്യവുമാണ്​. ഈ സാഹചര്യത്തിൽ കരാർ ഇന്ത്യക്കും യു.എ.ഇക്കും​ വലിയ നിലയിൽ സഹായകമാകുന്നതാണ്​. അതേസമയം തുർക്കിയുമായും വ്യപാരത്തിൽ വലിയ വളർച്ച നേടുന്നതിന്​ അവസാനഘട്ട കൂടിയാലോനകൾ പുരോഗമിക്കുകയാണെന്ന്​ മന്ത്രി അൽ മർറി അഭിമുഖത്തിൽ പറഞ്ഞു.

### Related Links & Sources
- [Original Story Source](https://gcc.truevisionnews.com/news/132948/economicgrowth-in-the-uae-will-be-sevenpercent)