---
title: "#death | സാമൂഹികപ്രവർത്തകൻ സലാഹുദ്ദീൻ കടന്നമണ്ണ നിര്യാതനായി"
english_title: "#death #Social #activist #Salahuddin #Kaadmanna #passedaway"
publisher: "gccnews.in"
canonical_url: "https://gcc.truevisionnews.com/news/140272/death-social-activist-salahuddin-kaadmanna-passedaway"
published_at: "2023-08-19T16:59:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/64e0a800ad7b5_Untitled-1.jpg"
keywords: []
---

# #death | സാമൂഹികപ്രവർത്തകൻ സലാഹുദ്ദീൻ കടന്നമണ്ണ നിര്യാതനായി

> **Lead Summary:** **റിയാദ് : **മുൻ പ്രവാസിയും തനിമ കലാസാംസ്​കാരിക വേദി റിയാദ് ഘടകം പ്രസിഡൻറുമായിരുന്ന ആലങ്ങാടൻ സലാഹുദ്ദീൻ കടന്നമണ്ണ നാട്ടിൽ നിര്യാതനായി.

## Article Content

**റിയാദ് : **മുൻ പ്രവാസിയും തനിമ കലാസാംസ്​കാരിക വേദി റിയാദ് ഘടകം പ്രസിഡൻറുമായിരുന്ന ആലങ്ങാടൻ സലാഹുദ്ദീൻ കടന്നമണ്ണ നാട്ടിൽ നിര്യാതനായി.

കൃഷിസ്ഥലത്ത് കുഴഞ്ഞുവീണതിനെ തുടർന്നു പെരിന്തൽമണ്ണ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. 27 വർഷം റിയാദിൽ പ്രവാസിയായിരുന്ന അദ്ദേഹം 2021ൽ പ്രവാസം അവസാനിപ്പിച്ച്​ മടങ്ങി.

ഇപ്പോൾ ശാന്തപുരം അൽ ജാമിഅഃ അൽ ഇസ്‌ലാമിയയിൽ അധ്യാപകനാണ്.ആലങ്ങാടൻ മൊയ്തീൻ മൗലവി, ആഇശ ദമ്പതികളുടെ മകനായി കടന്നമണ്ണയിലാണ്​ ജനനം. ശാന്തപുരം ഇസ്​ലാമിയ്യ കോളജിൽ പഠിച്ച് എഫ്.ഡി, ബി.എ. ബിരുദങ്ങൾ നേടി.

മമ്പാട് റഹ്​മാനിയ കോളജ്, ഫറോക്ക് ഇർഷാദിയാ കോളജ്, ശാന്തപുരം ഇസ്​ലാമിയ കോളജ് എന്നിവിടങ്ങളിൽ അധ്യാപകനായി. 1987-ൽ സൗദി അറേബ്യയിലെ കിങ്​ സഊദ് യൂനിവേഴ്സിറ്റിയിൽ ഉപരിപഠനം. മടങ്ങിവന്ന് വീണ്ടും ശാന്തപുരത്ത് അധ്യാപകനായി.

ശാന്തപുരം ഇസ്​ലാമിയ കോളജ് വിദ്യാർഥി ഹൽഖ, എസ്.ഐ.ഒ മലപ്പുറം ജില്ല എന്നിവയുടെ സെക്രട്ടറിയായിരുന്നു. 1993 ലാണ്​ സൗദി അറേബ്യയിൽ പ്രവാസിയായി എത്തുന്നത്​. റിയാദിലെ അൽജുമൈഹ് ആൻഡ്​ ഷെൽ ലൂബ്രിക്കേറ്റിങ്​ ഓയിൽ കമ്പനിയിൽ അഡ്മിനിസ്ട്രേറ്റീവ് സെക്രട്ടറിയായാണ് വിരമിച്ചത്.

നാട്ടിലെത്തിയ ശേഷം അൽജാമിഅയിൽ അധ്യാപകനായി സേവനമനുഷ്ഠിച്ച് വരികയായിരുന്നു. ജമാഅത്തെ ഇസ്​ലാമി അംഗമായിരുന്നു.

തനിമ റിയാദ് പ്രസിഡൻറ്​, ജനറൽ സെക്രട്ടറി, മദ്റസ - ഹജ്ജ് - ഖുർആൻ സ്​റ്റഡി സെൻറർ കോഓഡിനേറ്റർ, ശാന്തപുരം അലുംനി അസോസിയേഷൻ റിയാദ് ചാപ്റ്റർ പ്രസിഡൻറ്​ എന്നീ ചുമതലകൾ വഹിച്ചു. സൗമ്യനും മിതഭാഷിയുമായിരുന്ന അദ്ദേഹത്തിന് ധാരാളം സൗഹൃദങ്ങളുണ്ടായിരുന്നു.

ഭാര്യ: ഹബീബ കളത്തിങ്ങൽ, മക്കൾ: അഹ്​മദ് നാദിർ, സന, സഫീർ, സാനിദ്. മരുമക്കൾ: സുഹൈൽ മോങ്ങം, നഫ്​ല ബാനു. സഹോദരങ്ങൾ: അബ്​ദുറഹ്​മാൻ, മുനീർ, ഫാത്തിമക്കുട്ടി, ഹബീബ, സുബൈദ, സഈദ, ഹാഫിദ, ഫൗസിയ, നസീമ.

### Related Links & Sources
- [Original Story Source](https://gcc.truevisionnews.com/news/140272/death-social-activist-salahuddin-kaadmanna-passedaway)