---
title: "ഷാർജയില്‍ ആഴ്ചയിൽ മൂന്നു ദിവസത്തെ വാരാന്ത്യ അവധി"
english_title: "Three days a week weekend in Sharjah"
publisher: "gccnews.in"
canonical_url: "https://gcc.truevisionnews.com/news/15471/three-days-a-week-weekend-in-sharjah"
published_at: "2021-12-10T19:54:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/61b363ce10b27_sharjaa.jpg"
keywords: []
---

# ഷാർജയില്‍ ആഴ്ചയിൽ മൂന്നു ദിവസത്തെ വാരാന്ത്യ അവധി

> **Lead Summary:** **ഷാർജ : **ഷാർജയില്‍ ആഴ്ചയിൽ മൂന്നു ദിവസത്തെ വാരാന്ത്യ അവധി** **പ്രഖ്യാപിച്ചു.** **ഷാർജയിലെ പൊതുമേഖലാ ജീവനക്കാർക്ക് ആഴ്ചയിൽ നാലു ദിവസത്തെ പ്രവൃത്തി ദിവസവും മൂന്നു ദിവസത്തെ വാരാന്ത്യ അവധിയുമാണ് പ്രഖ്യാപിച്ചത്. കഴിഞ്ഞ ദിവസം പ്രഖ്യാപിച്ച മൂന്നര ദിവസത്തേക്കാൾ അര ദിവസത്തെ അവധി കൂടുതൽ ഷാർജയിലെ ഗവൺമെന്റ് ഉദ്യോഗസ്ഥർക്ക് ലഭിക്കും.

## Article Content

**ഷാർജ : **ഷാർജയില്‍ ആഴ്ചയിൽ മൂന്നു ദിവസത്തെ വാരാന്ത്യ അവധി** **പ്രഖ്യാപിച്ചു.** **ഷാർജയിലെ പൊതുമേഖലാ ജീവനക്കാർക്ക് ആഴ്ചയിൽ നാലു ദിവസത്തെ പ്രവൃത്തി ദിവസവും മൂന്നു ദിവസത്തെ വാരാന്ത്യ അവധിയുമാണ് പ്രഖ്യാപിച്ചത്. കഴിഞ്ഞ ദിവസം പ്രഖ്യാപിച്ച മൂന്നര ദിവസത്തേക്കാൾ അര ദിവസത്തെ അവധി കൂടുതൽ ഷാർജയിലെ ഗവൺമെന്റ് ഉദ്യോഗസ്ഥർക്ക് ലഭിക്കും.

യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ.സുൽത്താൻ ബിൻ മുഹമ്മദ് അൽ ഖാസിമിയുടെ നിർദേശത്തെത്തുടർന്ന് ഉപ ഭരണാധികാരി ഷെയ്ഖ് സുൽത്താൻ ബിൻ അഹമ്മദ് അൽ ഖാസിമിയാണ് ഇന്ന് ഷാർജ എക്‌സിക്യൂട്ടീവ് കൗൺസിലിൽ തീരുമാനം പ്രഖ്യാപിച്ചത്.

ഇതു 2022 ജനുവരി 1-ന് പ്രാബല്യത്തിൽ വരും. തിങ്കൾ മുതൽ വ്യാഴം വരെ ജീവനക്കാർ രാവിലെ 7.30 മുതൽ വൈകീട്ട് 3.30 വരെ പ്രവർത്തിക്കും, ഇത് ഇപ്പോഴുള്ളതിനേക്കാൾ 60 മുതൽ 90 മിനിറ്റ് വരെ ദൈർഘ്യമുള്ളതാണ്. ശനി-ഞായർ വാരാന്ത്യത്തിലേക്കുള്ള ഫെഡറൽ ഗവണ്‍മെന്റിന്റെ മാറ്റത്തെ തുടർന്നാണ് ഈ തീരുമാനം.

വെള്ളിയാഴ്ച അര ദിവസത്തെ ജോലി മാറ്റം വരുത്താൻ സ്വകാര്യ മേഖലയ്ക്ക് ഔദ്യോഗിക നിർദ്ദേശങ്ങളൊന്നും നൽകിയിട്ടില്ലെന്നും അവരുടെ സ്വന്തം വിവേചനാധികാരത്തിൽ അത് ചെയ്യാമെന്നും യുഎഇ തൊഴിൽ മന്ത്രി പറഞ്ഞു. ആഴ്ചയിൽ മൂന്നു ദിവസത്തെ അവധി നൽകിയതു വഴി ഷാർജയുടെ സർക്കാർ മേഖലയെ ഗൾഫിലും മധ്യപൂർവദേശത്തും പൂർണമായി നാലു ദിവസത്തെ പ്രവൃത്തി അംഗീകരിക്കുന്ന ആദ്യ മേഖലയാക്കി മാറ്റി.

ദുബായ്, അബുദാബി, റാസൽഖൈമ, ഫുജൈറ എന്നിവിടങ്ങളിലെ സർക്കാരുകളെല്ലാം ആഴ്ചയിൽ നാലര ദിവസത്തെ പ്രവൃത്തിദിനമാണ് നടപ്പിലാക്കുക. തിങ്കൾ മുതൽ വെള്ളി വരെയുള്ള പ്രവൃത്തിദിവസം നടപ്പിലാക്കാൻ രാജ്യത്തെ സ്‌കൂളുകൾ ഇതിനകം തന്നെ തയ്യാറെടുപ്പ് നടത്തിയിട്ടുണ്ട്. 2022 ജനുവരി 3 ന് സ്‌കൂളുകൾ പുതിയ ടൈംടേബിളുമായി തുറക്കുമെന്നാണു പ്രതീക്ഷ.

### Related Links & Sources
- [Original Story Source](https://gcc.truevisionnews.com/news/15471/three-days-a-week-weekend-in-sharjah)