മസ്‌കത്ത് : (gcc.truevisionnews.com) ഒമാനില്‍ തണുപ്പ് ശക്തമാകുന്നു. ശൈത്യകാലം ആരംഭിച്ചതോടെ താപനിലയില്‍ മാറ്റം സംഭവിച്ചു.
വരും ദിവസങ്ങളിലും തണുത്ത കാലാവസ്ഥാ തന്നെ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
ഇന്നലെ ഏറ്റവും താഴ്ന്ന താപനില റിപ്പോര്‍ട്ട് ചെയ്യപ്പെട്ടത് ദാഖിലിയ ഗവര്‍ണറേറ്റിലെ സൈഖ് പ്രദേശത്താണ്. 0.5 ഡിഗ്രി സെല്‍ഷ്യസായിരുന്നു ഇവിടുത്തെ താപനില.
മസ്‌യൂന (7.0 ഡിഗ്രി), മുഖ്ശിന്‍ (8.3 ഡിഗ്രി), തുംറൈത്ത് (9.1 ഡിഗ്രി), ഖൈറൂന്‍ ഹിര്‍ത്തി (10.2 ഡിഗ്രി), യങ്കല്‍ (11.4 ഡിഗ്രി), ഹൈമ (11.5 ഡിഗ്രി) എന്നിവയാണ് കുറഞ്ഞ താപനില രേഖപ്പെടുത്തിയ രാജ്യത്തെ മറ്റു പ്രദേശങ്ങള്‍.
ഡിസംബര്‍ 23 വരെ നിലവിലെ തണുപ്പ് തുടരുമെന്നാണ് കാലാവസ്ഥാ നിരീക്ഷണം. ഇന്ന് മസ്‌കത്തില്‍ 21 ഡിഗ്രി സെള്‍ഷ്യസാണ് കുറഞ്ഞ താപനില പ്രതീക്ഷിക്കുന്നത്.
തുടര്‍ ദിവസങ്ങളിലും സമാന താപനില തന്നെയാണ് പ്രതീക്ഷിക്കുന്നത്. എന്നാല്‍, ഈ മാസം 21, 22 തീയതികളില്‍ താപനില 18 ഡിഗ്രി സെല്‍ഷ്യസായി കുറയും. ജബല്‍ ശംസില്‍ അതിശൈത്യമാണ് വരും ദിവസങ്ങളില്‍ അനുഭവപ്പെടുക.
#Cold #intensifying #Oman #cold #weather #continue #coming #days
