ദോഹ: (gcc.truevisionnews.com) രാജ്യത്തെ ഗതാഗതമേഖലയിൽ വിപ്ലവകരമായ മുന്നേറ്റമായി ഓട്ടോണമസ് ഇലക്ട്രിക് ടാക്സികളുടെ പുതുഘട്ടത്തിലേക്ക് ചുവടുവെച്ച് ഗതാഗത മന്ത്രാലയം. തെരഞ്ഞെടുക്കപ്പെട്ട പ്രദേശങ്ങളിൽ മുവാസലത്ത് (കർവ) ഓട്ടോണമസ് ഇലക്ട്രിക് ടാക്സികളുടെ ലെവൽ 4 പ്രവർത്തനപരിശോധന ആരംഭിച്ചതായി ഖത്തർ ഗതാഗത മന്ത്രാലയം അറിയിച്ചു.
തയാറെടുപ്പിന്റെ ഭാഗമായി മന്ത്രാലയത്തിന്റെ ഏകോപനത്തിൽ, രണ്ട് ഘട്ടത്തിലുള്ള പൈലറ്റ് പ്രോഗ്രാം ഓട്ടോണമസ് ടാക്സികൾക്കായി കർവ നടത്തും. ആദ്യഘട്ടത്തിൽ, ഒരു വിദഗ്ധ സംഘത്തിന്റെ നിരീക്ഷണത്തിൽ യാത്രക്കാരില്ലാതെ പരീക്ഷണ ഓട്ടങ്ങൾ സംഘടിപ്പിക്കും. രണ്ടാം ഘട്ടത്തിൽ, ഡ്രൈവറില്ലാതെ യാത്രക്കാർ മാത്രമായി പൂർണതോതിലുള്ള പരീക്ഷണ ഓട്ടവും നടക്കും.
ഈ പരീക്ഷണങ്ങൾ അടുത്ത വർഷത്തിന്റെ ആദ്യ പാദംവരെ തുടരും. ഈ പരീക്ഷണങ്ങളിലൂടെ സാങ്കേതികവിദ്യയുടെ പ്രവർത്തനവും കാര്യക്ഷമതയും വിലയിരുത്തും. അടിസ്ഥാന സൗകര്യങ്ങൾ ഒരുക്കുക എന്ന ലക്ഷ്യത്തോടൊപ്പം സ്മാർട്ട് മൊബിലിറ്റി പദ്ധതികളുടെ ഭാഗമായാണിത് നടപ്പാക്കുന്നത്. പരീക്ഷണങ്ങൾക്ക് ഉപയോഗിക്കുന്ന ഓരോ സ്വയംനിയന്ത്രിത ടാക്സിയിലും സുരക്ഷ ഉറപ്പാക്കാൻ ആറു ക്യാമറകൾ, നാല് റഡാറുകൾ, നാല് ലിഡാർ യൂനിറ്റുകളും ഘടിപ്പിച്ചിട്ടുണ്ട്. ഇതിലൂടെ കൃത്യമായ നാവിഗേഷനും ഉറപ്പുവരുത്തുന്നു.
മുമ്പ് നടപ്പാക്കിയ സ്വയംനിയന്ത്രിത ഇലക്ട്രിക് ബസ് പരീക്ഷണങ്ങൾക്ക് ലഭിച്ച അനുകൂല പ്രതികരണങ്ങളിൽനിന്നാണ് പുതിയ പദ്ധതിക്ക് തുടക്കം കുറിച്ചത്. മന്ത്രാലയം രൂപവത്കരിച്ച സ്വയം ഓട്ടോണമസ് വാഹനങ്ങളിലെ നയരേഖയുമായി ഇത് പൊരുത്തപ്പെടുന്നതുമാണ്. പരിസ്ഥിതി സൗഹൃദവും നവീനവുമായ സാങ്കേതിക വിദ്യകളിലൂടെ പൊതുഗതാഗത സംവിധാനം മെച്ചപ്പെടുത്തുക എന്നതാണ് ഈ നയത്തിന്റെ ലക്ഷ്യം.
Driverless taxis Qatar ready to change the level
