---
title: "ദീപാവലി ആഘോഷത്തിനിടെ മലയാളി വിദ്യാർഥി കുഴഞ്ഞുവീണ്​ മരിച്ചു"
english_title: "Malayali student collapses and dies during Diwali celebrations"
publisher: "gccnews.in"
canonical_url: "https://gcc.truevisionnews.com/news/321994/malayali-student-collapses-and-dies-during-diwali-celebrations"
published_at: "2025-10-22T22:04:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/68f9079a55399_kk.jpg"
keywords: []
---

# ദീപാവലി ആഘോഷത്തിനിടെ മലയാളി വിദ്യാർഥി കുഴഞ്ഞുവീണ്​ മരിച്ചു

> **Lead Summary:** **ദുബൈ: [** ദീപാവലി ആഘോഷത്തിനിടെ മലയാളി വിദ്യാർഥി മരിച്ചു. പ്രവാസി ദമ്പതികളായ വി.ജി. കൃഷ്ണകുമാറിന്‍റെയും വിദു കൃഷ്ണകുമാറിന്‍റെയും മകൻ വൈഷ്ണവ്​ കൃഷ്ണകുമാർ ആണ്​ മരിച്ചത്​. മാവേലിക്കര സ്വദേശിയാണ്. ദുബൈയിൽ ബി.ബി.എ (മാർക്കറ്റിങ്​) ബിരുദ ഒന്നാംവർഷ വിദ്യാർഥിയാണ്​.

## Article Content

**ദുബൈ: [** ദീപാവലി ആഘോഷത്തിനിടെ മലയാളി വിദ്യാർഥി മരിച്ചു. പ്രവാസി ദമ്പതികളായ വി.ജി. കൃഷ്ണകുമാറിന്‍റെയും വിദു കൃഷ്ണകുമാറിന്‍റെയും മകൻ വൈഷ്ണവ്​ കൃഷ്ണകുമാർ ആണ്​ മരിച്ചത്​. മാവേലിക്കര സ്വദേശിയാണ്. ദുബൈയിൽ ബി.ബി.എ (മാർക്കറ്റിങ്​) ബിരുദ ഒന്നാംവർഷ വിദ്യാർഥിയാണ്​.

ചൊവ്വാഴ്ച രാത്രി ദുബൈ ഇന്‍റർനാഷനൽ അക്കാദമിക്​ സിറ്റിയിൽ ദീപാവലി ആഘോഷിക്കുന്നതിനിടെ കുഴഞ്ഞുവീഴുകയായിരുന്നു. ഉടൻ ആംബുലൻസിൽ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഹൃദയാഘാതമാണ്​ മരണകാരണ​മെന്നാണ് ആശുപത്രി രേഖകൾ ഉദ്ധരിച്ച്​ പ്രാദേശിക മാധ്യമങ്ങൾ റിപ്പോർട്ട്​ ചെയ്യുന്നത്​. വൃഷ്ടി കൃഷ്ണകുമാറാണ്​ വൈഷ്ണവിന്‍റെ സഹോദരി. നിയമനടപടികൾ പൂർത്തിയാക്കി മൃതദേഹം നാട്ടിലേക്ക്​ കൊണ്ടുപോകുമെന്നാണ്​ ബന്ധുക്കൾ അറിയിച്ചിരിക്കുന്നത്​.

ദുബൈ ജെംസ്​ അവർ ഓൺ ഇന്ത്യൻ സ്കൂളിലായിരുന്നു വൈഷ്ണവിന്‍റെ പന്ത്രണ്ടാം ക്ലാസ്​ പഠനം​. അകാദമിക രംഗത്തും പാഠ്യേതര വിഷയങ്ങളിലും മിടുക്കനായ വിദ്യാർഥിയായിരുന്നു വൈഷ്ണവ്​. കഴിഞ്ഞ വർഷം സി.ബി.എസ്​.ഇ 12 ക്ലാസ്​ പരീക്ഷയിൽ 97.4 ശതമാനം മാർക്ക്​ നേടിയിരുന്നു. പാഠ്യ, പാഠ്യേതര വിഷയത്തിലെ മികച്ച പ്രകടനം കണക്കിലെടുത്ത്​​​ യു.എ.ഇ ഗോൾഡൻ വിസ നൽകി ആദരിച്ചിരുന്നു​. മാർക്കറ്റിങ്​, സംരംഭക വിഷയങ്ങളിൽ മികച്ച രീതിയിൽ അവഗാഹമുണ്ടായിരുന്ന വൈഷ്ണവ്​ സമൂഹ മാധ്യമങ്ങളിലും സജീവമായിരുന്നു.

സാമ്പത്തിക ഉപദേശങ്ങൾക്കൊപ്പം ലൈഫ്​ സ്​റ്റൈൽ, മോട്ടിവേഷൻ, ദൈനംദിന ​വർക്കൗട്ട്​ എന്നീ വിഷയങ്ങൾ ഉൾപ്പെടുത്തി സമൂഹ മാധ്യമങ്ങളിലൂടെ സ്ഥിരമായി വിഡിയോ ചെയ്യാറുണ്ടായിരുന്നു. മിടുക്കനായ വിദ്യാർഥിയുടെ അപ്രതീക്ഷിത വിടവാങ്ങലിന്‍റെ ഞെട്ടലിലാണ്​ സഹപാഠികളും അധ്യാപകരും.

### Related Links & Sources
- [Original Story Source](https://gcc.truevisionnews.com/news/321994/malayali-student-collapses-and-dies-during-diwali-celebrations)