---
title: "മഴക്കുവേണ്ടി മുസ്ലിം പള്ളികളിൽ പ്രത്യേക പ്രാർത്ഥനയൊരുക്കം; നാളെ 125 പള്ളികളിൽ ഒരേ സമയം നമസ്കാരം"
english_title: "Special prayers in mosques for rain, prayers in mosques, Kuwait"
publisher: "gccnews.in"
canonical_url: "https://gcc.truevisionnews.com/news/324840/special-prayers-in-mosques-for-rain-prayers-in-mosques-kuwait-new"
published_at: "2025-11-07T17:02:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/690dd9bb6b99a_praying.jpg"
keywords: []
---

# മഴക്കുവേണ്ടി മുസ്ലിം പള്ളികളിൽ പ്രത്യേക പ്രാർത്ഥനയൊരുക്കം; നാളെ 125 പള്ളികളിൽ ഒരേ സമയം നമസ്കാരം

> **Lead Summary:** **** കുവൈറ്റിൽ കഴിഞ്ഞ ചില ആഴ്ചകളായി തുടരുന്ന വരൾച്ചയും മഴക്കുറവും നേരിടുന്ന സാഹചര്യത്തിൽ, ശനിയാഴ്ച രാജ്യവ്യാപകമായി മഴക്കുവേണ്ടി പ്രത്യേക പ്രാർത്ഥന നടത്തുമെന്ന് ഔഖാഫ് മന്ത്രാലയം അറിയിച്ചു.

## Article Content

**** കുവൈറ്റിൽ കഴിഞ്ഞ ചില ആഴ്ചകളായി തുടരുന്ന വരൾച്ചയും മഴക്കുറവും നേരിടുന്ന സാഹചര്യത്തിൽ, ശനിയാഴ്ച രാജ്യവ്യാപകമായി മഴക്കുവേണ്ടി പ്രത്യേക പ്രാർത്ഥന നടത്തുമെന്ന് ഔഖാഫ് മന്ത്രാലയം അറിയിച്ചു.

> രാജ്യത്തെ 125 പള്ളികളിൽ ഒരുമിച്ചായിരിക്കും പ്രാർത്ഥന നടക്കുക. രാവിലെ 10.30നാണ് നിശ്ചയിച്ചിരിക്കുന്ന നമസ്കാര സമയം. മഴയ്ക്കായി പ്രത്യേക നമസ്കാരം നടത്തുന്നത് ഇസ്ലാമിക പാരമ്പര്യത്തിൻ്റെ ഭാഗമാണ്. പ്രവാചകനായ മുഹമ്മദ് നബി നടത്തിയിരുന്ന ഈ പ്രത്യേക നമസ്കാരമാണ് "സലാതുൽ ഇസ്തിസ്ഖാ" എന്നറിയപ്പെടുന്നത്.

വരൾച്ച, മഴക്കുറവ് തുടങ്ങിയ കാലങ്ങളിൽ ദൈവത്തോട് കരുണയും അനുഗ്രഹവും അപേക്ഷിച്ച് നടത്തുന്ന ഒരു ആത്മീയ പ്രാർത്ഥനയാണിത്. ഔഖാഫ് മന്ത്രാലയത്തിന്റെ പ്രസ്താവനയിൽ പറയുന്നത് പ്രകാരം, ഈ പ്രാർത്ഥനയിൽ രാജ്യത്തെ ഭരണാധികാരികൾ, മന്ത്രിമാർ, ഉന്നത ഉദ്യോഗസ്ഥർ, പൊതുജനങ്ങൾ എന്നിവർ സജീവമായി പങ്കെടുക്കും.

സമൂഹത്തിന്റെ എല്ലാ തലങ്ങളിലുമുള്ള മുസ്ലിംകൾക്ക് പങ്കെടുക്കാനുള്ള അവസരം ഒരുക്കിയിട്ടുണ്ടെന്നും പ്രസ്താവനയിൽ വ്യക്തമാക്കുന്നു. പള്ളികളിൽ ആവശ്യമായ ക്രമീകരണങ്ങൾ പൂർത്തിയാക്കിയതായി അറിയിച്ചു. വെള്ളം, വൈദ്യുതി, ശുചിത്വം തുടങ്ങിയ സൗകര്യങ്ങൾ ഉറപ്പാക്കുന്നതിനായി പ്രാദേശിക ഭരണസംവിധാനങ്ങളുമായി സഹകരണം ഉറപ്പാക്കിയിട്ടുണ്ട്.

രാജ്യത്ത് കഴിഞ്ഞ ചില മാസങ്ങളായി മഴയില്ലാത്തതിനാൽ കൃഷിയിടങ്ങൾക്കും ജലസംഭരണികൾക്കും കനത്ത പ്രതിസന്ധിയാണ് നേരിടുന്നത്. ഇതിന്റെ പശ്ചാത്തലത്തിലാണ് പ്രത്യേക പ്രാർത്ഥനക്ക് ഔഖാഫ് മന്ത്രാലയം ആഹ്വാനം ചെയ്തിരിക്കുന്നത്. മന്ത്രാലയം പൗരന്മാരോടും പ്രവാസികളോടും ദൈവാനുഗ്രഹം അപേക്ഷിച്ച് വിനയപൂർവ്വം പങ്കെടുക്കണമെന്ന് അഭ്യർത്ഥിച്ചിട്ടുണ്ട്.

### Related Links & Sources
- [Original Story Source](https://gcc.truevisionnews.com/news/324840/special-prayers-in-mosques-for-rain-prayers-in-mosques-kuwait-new)