---
title: "രൂപമൂല്യം കുത്തനെ ഇടിഞ്ഞു; റിയാൽ വിനിമയത്തിൽ പുത്തൻ റെക്കോർഡ് "
english_title: "Rupee value, Omani rial"
publisher: "gccnews.in"
canonical_url: "https://gcc.truevisionnews.com/news/329154/rupee-value-omani-rial"
published_at: "2025-12-03T13:31:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/692feedbd70af_riyaaal.jpg"
keywords: []
---

# രൂപമൂല്യം കുത്തനെ ഇടിഞ്ഞു; റിയാൽ വിനിമയത്തിൽ പുത്തൻ റെക്കോർഡ് 

> **Lead Summary:** **മസ്‌കറ്റ്:[ [gcc.truevisionnews.com] ] **അന്താരാഷ്ട്ര വിപണിയിൽ ഇന്ത്യൻ രൂപ തുടർച്ചയായി മൂല്യം നഷ്ടപ്പെടുന്നതിനിടെ ഒമാനി റിയാലുമായുള്ള വിനിമയ നിരക്കും ചരിത്രത്തിലെ ഏറ്റവും ഉയർന്ന നിരക്കിലെത്തി.

## Article Content

**മസ്‌കറ്റ്:[ [gcc.truevisionnews.com] ] **അന്താരാഷ്ട്ര വിപണിയിൽ ഇന്ത്യൻ രൂപ തുടർച്ചയായി മൂല്യം നഷ്ടപ്പെടുന്നതിനിടെ ഒമാനി റിയാലുമായുള്ള വിനിമയ നിരക്കും ചരിത്രത്തിലെ ഏറ്റവും ഉയർന്ന നിരക്കിലെത്തി.

ഒമാനിലെ ചില എക്‌സ്‌ചേഞ്ചുകൾ ഒരു ഒമാനി റിയാലിന് 233.35 രൂപ വരെ നൽകുന്നു. 233 രൂപ കവിയുന്ന ഈ നിരക്ക് പ്രവാസികൾ നാട്ടിലേക്ക് പണം അയയ്ക്കുന്നതിന് അനുകൂലമായിട്ടും വിദേശ കറൻസിയിൽ വായ്പ എടുത്തവർക്കും വിദേശസഞ്ചാരികൾക്കും ബുദ്ധിമുട്ടുകൾ സൃഷ്ടിച്ചിരിക്കുകയാണ്.

പ്രവാസികൾക്ക് ഒരേ തുകയയച്ചാൽ ലഭിക്കുന്നത് കൂടുതൽ രൂപയെന്നതിനാൽ ഇത് ആനുകൂല്യമായി നിൽക്കുന്നുവെങ്കിലും വിദേശനാണയ വായ്പകൾ തിരിച്ചടയ്ക്കുന്നവർക്ക് ചെലവ് ഗണ്യമായി കൂടും.

വിദേശയാത്ര, ചികിത്സ തുടങ്ങിയ ആവശ്യങ്ങൾക്കായുള്ള ചെലവും ഉയർന്നേക്കും. അമേരിക്കൻ ഡോളറിനെതിരെ രൂപ ചൊവ്വാഴ്ച 89.87-ൽ വ്യാപാരം അവസാനിപ്പിച്ചു.

തിങ്കളാഴ്ചയുമായി താരതമ്യം ചെയ്യുമ്പോൾ 33 പൈസയുടെ ഇടിവാണിത്. ഇൻട്രാഡേയിൽ രൂപ 90 രൂപ എന്ന അതിർത്തിയിലേക്ക് നീങ്ങിയെങ്കിലും പിന്നീട് കുറച്ച് തിരിച്ചുകയറി.

ഈ വർഷം ഇതുവരെ രൂപയുടെ മൂല്യം 4.7 ശതമാനം വരെ ഇടിഞ്ഞു, മറ്റ് ഏഷ്യൻ കറൻസികളേക്കാൾ കൂടുതലാണ് ഈ നഷ്ടം. രൂപയുടെ വിലയിടിവിന് നിരവധി അന്താരാഷ്ട്ര–ദേശീയ കാരണങ്ങൾ വിദഗ്‌ധർ ചൂണ്ടിക്കാട്ടുന്നു.

***ഇന്ത്യ–അമേരിക്ക വ്യാപാര കരാറുകളിൽ താമസം***

***ബാങ്ക് ഓഫ് ജപ്പാന്റെ പലിശനിരക്ക് വർധന***

***ആഗോള ക്രിപ്റ്റോ വിപണിയിലെ വലിയ ഇടിവ്***

***ഇന്ത്യൻ കോർപ്പറേറ്റുകളിൽ നിന്ന് കൂടിയ ഡോളർ ആവശ്യം***

***വിപണിയിൽ ആർ.ബി.ഐ ശക്തമായി ഇടപെട്ടില്ലെന്ന വിലയിരുത്തൽ***

***ഓഹരി വിപണിയിൽ വൻതോതിൽ വിദേശ നിക്ഷേപ പിന്‍വലിക്കൽ***

എല്ലാം ചേർന്നാണ് രൂപയെ കൂടുതൽ സമ്മർദ്ദത്തിലാക്കിയത്. ഡിസംബർ 3 മുതൽ 5 വരെ നടക്കുന്ന ആർ.ബി.ഐ ധനപോളിസി അവലോകനത്തിൽ വരുന്ന തീരുമാനങ്ങളും ഫോറക്സ് മാർക്കറ്റിലെ കേന്ദ്രബാങ്കിന്റെ ഇടപെടലുകളും അടുത്ത ദിവസങ്ങളിലെ രൂപയുടെ ഗതിയെ നിർണയിക്കുമെന്ന് നിരീക്ഷകർ വിലയിരുത്തുന്നു.

### Related Links & Sources
- [Original Story Source](https://gcc.truevisionnews.com/news/329154/rupee-value-omani-rial)