---
title: "യുഎഇയിൽ നീന്തൽക്കുളത്തിൽ വീണ് നാലുവയസ്സുകാരിക്ക് അദ്ഭുതരക്ഷ; അതീവ ജാഗ്രത പാലിക്കണമെന്ന് അധികൃതർ"
english_title: "Miraculous rescue for four year old girl who fell into swimming pool in UAE"
publisher: "gccnews.in"
canonical_url: "https://gcc.truevisionnews.com/news/348269/miraculous-rescue-for-four-year-old-girl-who-fell-into-swimming-pool-in-uae"
published_at: "2026-03-17T17:28:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/69b9421418085_drowned_rescue.jpg"
keywords: []
---

# യുഎഇയിൽ നീന്തൽക്കുളത്തിൽ വീണ് നാലുവയസ്സുകാരിക്ക് അദ്ഭുതരക്ഷ; അതീവ ജാഗ്രത പാലിക്കണമെന്ന് അധികൃതർ

> **Lead Summary:** **അബുദാബി: [** നീന്തൽക്കുളത്തിൽ വീണ് മരണത്തെ മുഖാമുഖം കണ്ട നാലുവയസ്സുകാരി അദ്ഭുതകരമായി ജീവിതത്തിലേക്ക് തിരിച്ചുവന്നു. അബുദാബിയിലെ ഒരു നീന്തൽക്കുളത്തിൽ മലർന്നു വീണ കുട്ടി ഏകദേശം മൂന്ന് മിനിറ്റോളം വെള്ളത്തിനടിയിലായിരുന്നു. ഉടൻതന്നെ സ്ഥലത്തുണ്ടായിരുന്ന ഒരാൾ കുട്ടിയെ പുറത്തെടുക്കുകയും പ്രാഥമിക ശുശ്രൂഷകൾ (സിപിആർ) നൽകുകയും ചെയ്തതാണ് ജീവൻ രക്ഷിക്കാൻ നിർണായകമായത്.

## Article Content

**അബുദാബി: [** നീന്തൽക്കുളത്തിൽ വീണ് മരണത്തെ മുഖാമുഖം കണ്ട നാലുവയസ്സുകാരി അദ്ഭുതകരമായി ജീവിതത്തിലേക്ക് തിരിച്ചുവന്നു. അബുദാബിയിലെ ഒരു നീന്തൽക്കുളത്തിൽ മലർന്നു വീണ കുട്ടി ഏകദേശം മൂന്ന് മിനിറ്റോളം വെള്ളത്തിനടിയിലായിരുന്നു. ഉടൻതന്നെ സ്ഥലത്തുണ്ടായിരുന്ന ഒരാൾ കുട്ടിയെ പുറത്തെടുക്കുകയും പ്രാഥമിക ശുശ്രൂഷകൾ (സിപിആർ) നൽകുകയും ചെയ്തതാണ് ജീവൻ രക്ഷിക്കാൻ നിർണായകമായത്.

അടിയന്തര വൈദ്യസഹായമെത്തുമ്പോഴേക്കും കുട്ടിയുടെ പൾസ് തിരികെ ലഭിച്ചിരുന്നു. തുടർന്ന് വിദഗ്ധ ചികിത്സയ്ക്കായി ഷെയ്ഖ് ഖലീഫ മെഡിക്കൽ സിറ്റിയിലേക്ക് (SKMC) മാറ്റി. ആശുപത്രിയിലെത്തിക്കുമ്പോൾ കുട്ടി ബോധാവസ്ഥയിലായിരുന്നുവെങ്കിലും മിനിറ്റുകൾക്കുള്ളിൽ നില വഷളാകുകയും ശ്വാസതടസ്സവും ഓക്സിജൻ കുറയുന്ന അവസ്ഥയും ഉണ്ടാവുകയും ചെയ്തു. ഉടൻ തന്നെ മെഡിക്കൽ സംഘം അതീവ ജാഗ്രതയോടെ ചികിത്സ ആരംഭിച്ചതിനെത്തുടർന്നാണ് കുട്ടിയുടെ നില സാധാരണ നിലയിലായത്.

റമസാനിലെ പുലർച്ചെ സമയത്തെ തിരക്കുകൾക്കിടയിലും വഴിയാത്രക്കാരൻ കാട്ടിയ സമയോചിതമായ ഇടപെടൽ വലിയ അഭിനന്ദനത്തിന് അർഹമായി. മുങ്ങിമരണങ്ങൾ പോലുള്ള അപകടങ്ങളിൽ ഓരോ സെക്കൻഡും വിലപ്പെട്ടതാണെന്നും കൃത്യസമയത്ത് നൽകുന്ന പ്രഥമശുശ്രൂഷ ഒരാളുടെ ജീവൻ നിലനിർത്താൻ എത്രത്തോളം സഹായിക്കുമെന്നതിന്റെ തെളിവാണ് ഈ സംഭവമെന്ന് ഡോക്ടർമാർ പറഞ്ഞു. കുട്ടി ഇപ്പോൾ പീഡിയാട്രിക് തീവ്രപരിചരണ വിഭാഗത്തിൽ നിരീക്ഷണത്തിലാണ്. ജലാശയങ്ങൾക്ക് സമീപം കുട്ടികളെ വിടുമ്പോൾ അതീവ ജാഗ്രത പാലിക്കണമെന്ന് അധികൃതർ വീണ്ടും ഓർമിപ്പിച്ചു.

### Related Links & Sources
- [Original Story Source](https://gcc.truevisionnews.com/news/348269/miraculous-rescue-for-four-year-old-girl-who-fell-into-swimming-pool-in-uae)