---
title: "ആക്രമണത്തെ നേരിടാൻ സജ്ജം; സുരക്ഷാ കരുത്ത് വ്യക്തമാക്കി യുഎഇ പ്രതിരോധ മന്ത്രാലയം"
english_title: "UAE Ministry of Defense confirms security strength, ready to counter attacks"
publisher: "gccnews.in"
canonical_url: "https://gcc.truevisionnews.com/news/348418/uae-ministry-of-defense-confirms-security-strength-ready-to-counter-attacks"
published_at: "2026-03-18T14:51:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/69ba6eedcb743_13.jpg"
keywords: []
---

# ആക്രമണത്തെ നേരിടാൻ സജ്ജം; സുരക്ഷാ കരുത്ത് വ്യക്തമാക്കി യുഎഇ പ്രതിരോധ മന്ത്രാലയം

> **Lead Summary:** അബൂദബി: ഗൾഫ് മേഖലയിൽ നിലനിൽക്കുന്ന സങ്കീർണ്ണമായ യുദ്ധസാഹചര്യങ്ങൾക്കിടയിലും രാജ്യത്തിന്റെ സുരക്ഷാകവചം ഭദ്രമാണെന്ന് യുഎഇ പ്രതിരോധ മന്ത്രാലയം വ്യക്തമാക്കി. സംഘർഷം പത്തൊൻപതാം ദിവസത്തിലേക്ക് കടക്കുമ്പോൾ, യുഎഇയെ ലക്ഷ്യമിട്ടെത്തിയ രണ്ടായിരത്തിലധികം മിസൈലുകളെയും ഡ്രോണുകളെയും അത്യാധുനിക വ്യോമ പ്രതിരോധ സംവിധാനം വഴി വിജയകരമായി തടയാൻ കഴിഞ്ഞതായി മന്ത്രാലയം അറിയിച്ചു.

## Article Content

അബൂദബി: ഗൾഫ് മേഖലയിൽ നിലനിൽക്കുന്ന സങ്കീർണ്ണമായ യുദ്ധസാഹചര്യങ്ങൾക്കിടയിലും രാജ്യത്തിന്റെ സുരക്ഷാകവചം ഭദ്രമാണെന്ന് യുഎഇ പ്രതിരോധ മന്ത്രാലയം വ്യക്തമാക്കി. സംഘർഷം പത്തൊൻപതാം ദിവസത്തിലേക്ക് കടക്കുമ്പോൾ, യുഎഇയെ ലക്ഷ്യമിട്ടെത്തിയ രണ്ടായിരത്തിലധികം മിസൈലുകളെയും ഡ്രോണുകളെയും അത്യാധുനിക വ്യോമ പ്രതിരോധ സംവിധാനം വഴി വിജയകരമായി തടയാൻ കഴിഞ്ഞതായി മന്ത്രാലയം അറിയിച്ചു.

ദീർഘകാലം നീണ്ടുനിൽക്കുന്ന ഏത് വെല്ലുവിളിയെയും നേരിടാൻ ആവശ്യമായ കരുത്തും ആയുധശേഖരവും രാജ്യത്തിനുണ്ടെന്നും അധികൃതർ ആത്മവിശ്വാസം പ്രകടിപ്പിച്ചു. യുദ്ധഭീഷണി നിലനിൽക്കുന്നുണ്ടെങ്കിലും രാജ്യത്തെ സാമ്പത്തിക-വിനോദസഞ്ചാര മേഖലകൾ തടസ്സമില്ലാതെ പ്രവർത്തിക്കുന്നു എന്നത് ശ്രദ്ധേയമാണ്. ഇരുന്നൂറിലധികം രാജ്യങ്ങളിൽ നിന്നുള്ള താമസക്കാർ ഇവിടെ പൂർണ്ണ സുരക്ഷിതരാണെന്ന് മന്ത്രാലയം ചൂണ്ടിക്കാട്ടി.

കഴിഞ്ഞദിവസം അബൂദബിയിൽ നടന്ന വാർത്താസമ്മേളനത്തിൽ, തകർക്കപ്പെട്ട ഇറാനിയൻ മിസൈലുകളുടെയും ഡ്രോണുകളുടെയും അവശിഷ്ടങ്ങൾ അധികൃതർ പ്രദർശിപ്പിച്ചിരുന്നു. രാജ്യത്തിന്റെ പരമാധികാരത്തിന് നേരെയുള്ള ഏത് നീക്കത്തെയും ശക്തമായി പ്രതിരോധിക്കുമെന്നും ജനങ്ങളുടെ സുരക്ഷയിൽ വിട്ടുവീഴ്ചയില്ലെന്നും പ്രതിരോധ മന്ത്രാലയം ആവർത്തിച്ചു.

### Related Links & Sources
- [Original Story Source](https://gcc.truevisionnews.com/news/348418/uae-ministry-of-defense-confirms-security-strength-ready-to-counter-attacks)