അൽ ഖോബാർ: (gcc.truevisionnews.com) അസീസിയയിലുണ്ടായ വാഹനാപകടത്തെത്തുടർന്ന് ചികിത്സയിലായിരുന്ന പ്രമുഖ പ്രവാസി വ്യവസായി സജു വർഗീസ് (60) അന്തരിച്ചു. എറണാകുളം സൗത്ത് പറവൂർ സ്വദേശിയായ പനച്ചിക്കൽ സജു വർഗീസ് ഇന്ന് പുലർച്ചെ നാട്ടിലെ ആശുപത്രിയിൽ വച്ചാണ് മരണത്തിന് കീഴടങ്ങിയത്. കഴിഞ്ഞ മൂന്ന് പതിറ്റാണ്ടിലേറെയായി ദമാമിൽ ബിസിനസ് രംഗത്ത് സജീവമായിരുന്ന ഇദ്ദേഹം മികച്ചൊരു ഗായകനും സംഘാടകനുമായിരുന്നു.
കഴിഞ്ഞ ജനുവരി 23-ന് സംഭവിച്ച അപകടത്തിലാണ് സജു വർഗീസിന് ഗുരുതരമായി പരുക്കേറ്റത്. അസീസിയയിൽ നിന്ന് ദമാമിലേക്കുള്ള യാത്രയ്ക്കിടെ അദ്ദേഹം സഞ്ചരിച്ചിരുന്ന കാർ പിക്കപ്പുമായി കൂട്ടിയിടിക്കുകയായിരുന്നു. തലയ്ക്ക് ഗുരുതരമായി പരുക്കേറ്റ സജു വർഗീസിന്റെ ജീവൻ ദമാം അൽ മന ആശുപത്രിയിൽ വെന്റിലേറ്ററിന്റെ സഹായത്തോടെയാണ് നിലനിർത്തിയത്.
തുടർന്ന് വിദഗ്ധ ചികിത്സയ്ക്കായി എയർ ആംബുലൻസ് മാർഗം നാട്ടിലെത്തിച്ച് കോലഞ്ചേരി മെഡിക്കൽ കോളേജിൽ പ്രവേശിപ്പിച്ചു. അവിടെ ചികിത്സയിലിരിക്കെയാണ് മരണം സംഭവിച്ചത്.
പ്രവാസലോകത്തെ കലാ-സാംസ്കാരിക കൂട്ടായ്മകളിൽ തന്റേതായ ഇടം കണ്ടെത്തിയ വ്യക്തിയായിരുന്നു സജു. വേൾഡ് മലയാളി കൗൺസിൽ, സംഗമം തുടങ്ങിയ സംഘടനകളിലെ സജീവ സാന്നിധ്യമായിരുന്നു. കുടുംബസമേതം ദമാമിലായിരുന്നു താമസം.
പരേതയായ ഏലിയാമ്മ വർഗീസിന്റെയും വർഗീസ് പി.ജെ.യുടെയും മകനാണ്. ഭാര്യ: ഷീജ സജു. മക്കൾ: റിച്ചാർഡ്, റൊണാൾഡ്, റയ്മണ്ട്. സഹോദരങ്ങൾ: സജി മധു, സുജ ചാണ്ടി. മൃതദേഹം ഇന്നും നാളെയും പൊതുദർശനത്തിന് വെക്കും. നാളെ വൈകുന്നേരം മൂന്ന് മണിക്ക് തെക്കേ പറവൂർ മാർ യോഹന്നാൻ മാംദാന യാക്കോബായ സുറിയാനി വലിയപള്ളി സെമിത്തേരിയിൽ സംസ്കാരം നടക്കും.
Content Highlight: Car accident in Saudi Arabia Expatriate businessman dies while undergoing treatment
.jpeg)
