---
title: "ഉച്ചസമയത്ത് പുറത്തിറങ്ങരുതെന്ന് മുന്നറിയിപ്പ്;  സൗദിയിൽ കഠിന വേനൽചൂടിന്റെ കാലമായ ജംറത് അൽ-ഖൈദ് തുടങ്ങി"
english_title: "Jamrat Al-Qaydh Season Starts in Saudi Arabia: Hottest Days of the Year Begin"
publisher: "gccnews.in"
canonical_url: "https://gcc.truevisionnews.com/news/372976/saudi-arabia-jamrat-al-qaydh-season-hottest-days-start"
published_at: "2026-07-17T15:53:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a06d559b8723_uae_heat.jpg"
keywords: ["Saudi Arabia", "Jamrat Al Qaydh", "Saudi Weather", "Summer Saudi Arabia", "Saudi Temperature"]
---

# ഉച്ചസമയത്ത് പുറത്തിറങ്ങരുതെന്ന് മുന്നറിയിപ്പ്;  സൗദിയിൽ കഠിന വേനൽചൂടിന്റെ കാലമായ ജംറത് അൽ-ഖൈദ് തുടങ്ങി

> **Lead Summary:** റിയാദ്: സൗദി അറേബ്യയിൽ വർഷത്തിലെ ഏറ്റവും ഉയർന്ന ചൂട് അനുഭവപ്പെടുന്ന വേനൽക്കാല സീസണായ 'ജംറത് അൽ-ഖൈദ്' ആരംഭിച്ചു. സാധാരണയായി ജൂലൈ മാസം മധ്യത്തോടെ തുടങ്ങുന്ന ഈ കാലയളവ് ഓഗസ്റ്റ് ആദ്യവാരം വരെ തുടരുമെന്ന് കാലാവസ്ഥാ വിദഗ്ധർ അറിയിച്ചു.

## Article Content

റിയാദ്: സൗദി അറേബ്യയിൽ വർഷത്തിലെ ഏറ്റവും ഉയർന്ന ചൂട് അനുഭവപ്പെടുന്ന വേനൽക്കാല സീസണായ 'ജംറത് അൽ-ഖൈദ്' ആരംഭിച്ചു. സാധാരണയായി ജൂലൈ മാസം മധ്യത്തോടെ തുടങ്ങുന്ന ഈ കാലയളവ് ഓഗസ്റ്റ് ആദ്യവാരം വരെ തുടരുമെന്ന് കാലാവസ്ഥാ വിദഗ്ധർ അറിയിച്ചു.

ഈ വർഷം ജംറത് അൽ-ഖൈദ്, 'അൽ-ഹനഅ' (Al-Han'ah) എന്ന് വിളിക്കപ്പെടുന്ന ജെമിനി നക്ഷത്രചക്രത്തിലെ രണ്ടാം ഘട്ടത്തിന്റെ ആദ്യ ദിവസത്തോട് അനുബന്ധിച്ചാണ് തുടങ്ങിയിരിക്കുന്നത്. 13 ദിവസം നീണ്ടുനിൽക്കുന്ന അൽ-ഹനഅ, വേനൽക്കാലത്തിന്റെ നാലാമത്തെ പ്രധാന ജ്യോതിശാസ്ത്ര ഘട്ടമായാണ് പരിഗണിക്കുന്നത്.

ഈ സമയത്ത് രാജ്യത്തിന്റെ ഭൂരിഭാഗം പ്രദേശങ്ങളിലും താപനില ഗണ്യമായി ഉയരും. വർഷത്തിലെ ഏറ്റവും ഉയർന്ന താപനിലയാണ് ഈ ദിവസങ്ങളിൽ രേഖപ്പെടുത്തുന്നത്. ശക്തമായ ചൂടുകാറ്റുകൾക്കൊപ്പം തീരപ്രദേശങ്ങളിൽ ഈർപ്പത്തിന്റെ അളവും വർധിക്കുമെന്ന മുന്നറിയിപ്പ് കാലാവസ്ഥാ നിരീക്ഷണ കേന്ദ്രങ്ങൾ നൽകിയിട്ടുണ്ട്.

ജംറത് അൽ-ഖൈദ് പ്രാദേശികമായി 'തബ്ബാഖ് അൽ-തമർ' എന്ന പേരിലും അറിയപ്പെടുന്നു. അതായത് 'ഈന്തപ്പഴം പാകം ചെയ്യുന്ന കാലം'. അതിശക്തമായ ചൂട് കാരണം ഈന്തപ്പഴം വേഗത്തിൽ പഴുത്ത് 'റുതബ്' ഘട്ടത്തിലെത്തുന്നതാണ് ഇതിന്റെ പ്രത്യേകത. കർഷകർക്ക് ഈന്തപ്പഴം വിളവെടുപ്പിന്റെ തിരക്കേറിയ കാലം കൂടിയാണിത്.

ഇതിനിടെ പൊതുജനങ്ങൾക്ക് ജാഗ്രതാ നിർദേശവുമായി അഫാഖ് ജ്യോതിശാസ്ത്ര സൊസൈറ്റി അംഗം ബുർജാസ് അൽ-ഫാലിഹ് രംഗത്തെത്തി. ഉച്ച മുതൽ വൈകുന്നേരം വരെയുള്ള സമയങ്ങളിൽ നേരിട്ട് സൂര്യപ്രകാശം ഏൽക്കുന്നത് ഒഴിവാക്കണമെന്ന് അദ്ദേഹം പറഞ്ഞു. നിർജലീകരണവും സൂര്യാഘാതവും തടയാൻ ധാരാളം വെള്ളവും മറ്റ് ദ്രാവകങ്ങളും കുടിക്കണം.

പുറത്തിറങ്ങുമ്പോൾ ഇളം നിറമുള്ള കോട്ടൺ വസ്ത്രങ്ങൾ ധരിക്കുകയും തലമറയ്ക്കാൻ തൊപ്പിയോ കുടയോ ഉപയോഗിക്കുകയും ചെയ്യണമെന്നും അദ്ദേഹം നിർദേശിച്ചു.അധികൃതർ പുറത്തിറക്കുന്ന സുരക്ഷാ മാർഗനിർദേശങ്ങൾ കർശനമായി പാലിക്കണമെന്നും അദ്ദേഹം അഭ്യർഥിച്ചു.

### Related Links & Sources
- [Original Story Source](https://gcc.truevisionnews.com/news/372976/saudi-arabia-jamrat-al-qaydh-season-hottest-days-start)