---
title: "'ക്യു ആർ'  സ്കാൻ ചെയ്താൽ തിരക്കില്ലാത്ത വഴി; മക്കയിൽ തിരക്കുണ്ടോയെന്ന് മുൻകൂട്ടി അറിയാം; തീർത്ഥാടകർക്കായി പുതിയ ഡിജിറ്റൽ സംവിധാനം"
english_title: "Makkah Haram Launches Smart Crowd Guidance System for Umrah Pilgrims"
publisher: "gccnews.in"
canonical_url: "https://gcc.truevisionnews.com/news/373212/makkah-haram-smart-crowd-guidance-umrah-pilgrims-qr-code"
published_at: "2026-07-18T16:27:00+05:30"
category: "Gulf Focus"
language: "ml"
image: "https://cf.zdn.im/img/truevisionnews.com/0/image-uploads/69f443b571d2f_makkah.jpg"
keywords: ["Makkah", "Umrah", "Saudi Arabia", "Smart Guidance", "Crowd Management", "QR Code", "Pilgrims"]
---

# 'ക്യു ആർ'  സ്കാൻ ചെയ്താൽ തിരക്കില്ലാത്ത വഴി; മക്കയിൽ തിരക്കുണ്ടോയെന്ന് മുൻകൂട്ടി അറിയാം; തീർത്ഥാടകർക്കായി പുതിയ ഡിജിറ്റൽ സംവിധാനം

> **Lead Summary:** മക്ക: വിശുദ്ധ ഹറം പള്ളിയിലെത്തുന്ന ഉംറ തീർത്ഥാടകർക്കും വിശ്വാസികൾക്കും ആശ്വാസമായി പുതിയ ഡിജിറ്റൽ സംവിധാനം. തിരക്ക് ഒഴിവാക്കി അനായാസം കർമങ്ങൾ പൂർത്തിയാക്കാനുള്ള സ്മാർട്ട് ഗൈഡൻസ് സേവനത്തിന് സൗദി അധികൃതർ തുടക്കം കുറിച്ചു.

## Article Content

മക്ക: വിശുദ്ധ ഹറം പള്ളിയിലെത്തുന്ന ഉംറ തീർത്ഥാടകർക്കും വിശ്വാസികൾക്കും ആശ്വാസമായി പുതിയ ഡിജിറ്റൽ സംവിധാനം. തിരക്ക് ഒഴിവാക്കി അനായാസം കർമങ്ങൾ പൂർത്തിയാക്കാനുള്ള സ്മാർട്ട് ഗൈഡൻസ് സേവനത്തിന് സൗദി അധികൃതർ തുടക്കം കുറിച്ചു.

ഇരുഹറം കാര്യാലയങ്ങൾക്കായുള്ള ജനറൽ അതോറിറ്റിയാണ് ഈ പുതിയ പ്ലാറ്റ്ഫോം പുറത്തിറക്കിയത്. ഇതിലൂടെ മതാഫ് അതായത് ത്വവാഫ് ചെയ്യുന്ന സ്ഥലത്തെയും മസ്ആ അതായത് സഅ്‌യി ചെയ്യുന്ന സ്ഥലത്തെയും തിരക്കിന്റെ തത്സമയ വിവരങ്ങൾ ലഭ്യമാകും.

തീർത്ഥാടകർക്ക് തിരക്ക് കുറഞ്ഞ സമയവും റൂട്ടും മുൻകൂട്ടി തിരഞ്ഞെടുക്കാനാണ് ഈ സംവിധാനം പ്രധാനമായും ഉദ്ദേശിക്കുന്നത്. ഹറം പള്ളിയിലെ ജനക്കൂട്ടത്തെ കൂടുതൽ കാര്യക്ഷമമായി നിയന്ത്രിക്കുന്നതിനും സുരക്ഷ ഉറപ്പാക്കുന്നതിനും ഇത് സഹായകമാകും.

ഈ ഡിജിറ്റൽ പ്ലാറ്റ്ഫോമിലേക്ക് പ്രവേശിക്കാൻ തീർത്ഥാടകർക്ക് ഒരു QR കോഡ് സ്കാൻ ചെയ്താൽ മതി. QR കോഡ് സ്കാൻ ചെയ്യുന്നതോടെ ഫോണിൽ തത്സമയ വിവരങ്ങൾ ലഭിക്കും. ഏത് ഗേറ്റിലൂടെ പ്രവേശിക്കണം, ഏത് നിലയിലാണ് തിരക്ക് കുറവ്, ത്വവാഫിനും സഅ്‌യിക്കും ഏറ്റവും അനുയോജ്യമായ സമയം ഏതാണ് എന്നീ വിവരങ്ങളെല്ലാം ഇതിൽ ഉണ്ടാകും.

വിവരങ്ങൾ നിമിഷങ്ങൾക്കുള്ളിൽ അപ്ഡേറ്റ് ആയിക്കൊണ്ടിരിക്കും. അതിനാൽ തീർത്ഥാടകർക്ക് തിരക്ക് കുറഞ്ഞ സമയം നോക്കി തങ്ങളുടെ ഉംറ കർമങ്ങൾ പ്ലാൻ ചെയ്യാൻ സാധിക്കും. പ്രായമായവർക്കും കുട്ടികൾക്കൊപ്പം വരുന്നവർക്കും ഈ സേവനം ഏറെ പ്രയോജനകരമാകും.

ഹജ്ജ്, ഉംറ സീസണുകളിൽ ഹറം പള്ളിയിൽ വൻ ജനത്തിരക്കാണ് അനുഭവപ്പെടാറ്. തിരക്ക് കാരണം ത്വവാഫും സഅ്‌യിയും പൂർത്തിയാക്കാൻ മണിക്കൂറുകൾ എടുക്കുന്ന അവസ്ഥയുണ്ടായിരുന്നു. ഈ പ്രശ്നത്തിന് പരിഹാരമായാണ് സൗദി സർക്കാർ സാങ്കേതികവിദ്യയുടെ സഹായം തേടിയത്.

തീർത്ഥാടകർക്ക് കൂടുതൽ സൗകര്യപ്രദമായി ആരാധനകൾ നിർവഹിക്കാനും ഹറം പള്ളിയിലെ സുരക്ഷാ ക്രമീകരണങ്ങൾ സുഗമാക്കാനും ഈ പുതിയ സ്മാർട്ട് ഗൈഡൻസ് സംവിധാനം ഒരു നാഴികക്കല്ലാകുമെന്നാണ് അധികൃതരുടെ പ്രതീക്ഷ.

### Related Links & Sources
- [Original Story Source](https://gcc.truevisionnews.com/news/373212/makkah-haram-smart-crowd-guidance-umrah-pilgrims-qr-code)