ഖോർഫക്കാൻ റോഡിൽ വൻ ദുരന്തം; നിർത്തിയിട്ടിരുന്ന ലോറിയിലേക്ക് കാർ പാഞ്ഞുകയറി ഒമ്പത് മാസം പ്രായമുള്ള കുഞ്ഞും യുവതിയും മരിച്ചു

ഫുജൈറ : (https://gcc.truevisionnews.com/) ഖോർഫക്കാൻ റോഡിൽ നിർത്തിയിട്ടിരുന്ന ട്രക്കിലേക്ക് കാർ ഇടിച്ചുകയറിയുണ്ടായ അപകടത്തിൽ യുഎഇ സ്വദേശിനിയും ഒമ്പത് മാസം പ്രായമുള്ള കുഞ്ഞും ദാരുണമായി മരിച്ചു. അപകടത്തിൽ കുടുംബത്തിലെ മറ്റ് രണ്ട് പേർക്ക് പരുക്കേറ്റിട്ടുണ്ട്.

28 വയസ്സുകാരിയായ യുവതിയും കുഞ്ഞുമാണ് സംഭവസ്ഥലത്ത് വെച്ച് തന്നെ മരണപ്പെട്ടത്. ഗുരുതരമായി പരുക്കേറ്റ ഭർത്താവിനെയും നിസ്സാര പരുക്കുകളോടെ രക്ഷപ്പെട്ട മൂന്ന് വയസ്സുകാരിയായ മറ്റൊരു മകളെയും ഫുജൈറയിലെ ഷെയ്ഖ് ഖലീഫ ആശുപത്രിയിൽ പ്രവേശിപ്പിച്ചു.

ഇന്നലെ ഉച്ചയ്ക്ക് 12 മണിയോടെ ഫൗസ് പെട്രോളിയം മേഖലയിലായിരുന്നു അപകടം. നിയന്ത്രണം വിട്ട കാർ റോഡരികിൽ പാർക്ക് ചെയ്തിരുന്ന ട്രക്കിന്റെ പിന്നിലേക്ക് അതിവേഗം ഇടിച്ചുകയറുകയായിരുന്നു. ഡ്രൈവർമാരുടെ ശ്രദ്ധ തിരിഞ്ഞതാണ് പെട്ടെന്ന് വാഹനം നിയന്ത്രണം വിടാൻ കാരണമെന്ന് ഫുജൈറ പൊലീസ് ട്രാഫിക് ആൻഡ് പട്രോൾസ് വിഭാഗം ഡയറക്ടർ ബ്രി. സ്വാലിഹ് മുഹമ്മദ് അബ്ദുല്ല അൽ ധൻഹാനി വ്യക്തമാക്കി.

വാഹനമോടിക്കുമ്പോൾ ഫോൺ ഉപയോഗിക്കുന്നത് ഉൾപ്പെടെയുള്ള ശ്രദ്ധ തെറ്റിക്കുന്ന പ്രവൃത്തികളിൽ നിന്ന് വിട്ടുനിൽക്കണമെന്ന് പൊലീസ് കർശന മുന്നറിയിപ്പ് നൽകിയിട്ടുണ്ട്.

Content Highlight: Fujairah: Emirati Mother And 9-Month-Old Baby Killed In Car-Truck Crash On Khorfakkan Road

#Fujairah #Khorfakkan Road #UAE Accident #Traffic Crash #Sheikh Khalifa Hospital