---
title: "അനിഷ്‌ട സംഭവങ്ങൾക്ക് പിന്നാലെ ഇസ്രയേലിലേക്കുള്ള എല്ലാ സർവീസുകളും നിർത്തി ഫ്ലൈദുബായ്"
english_title: "Flydubai Suspends All Israel Services After In-Flight Incident"
publisher: "gccnews.in"
canonical_url: "https://gcc.truevisionnews.com/news/385280/flydubai-suspends-israel-services-incident"
published_at: "2026-10-03T09:06:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ac0788b98cc8_flydubai-suspends-israel-services-incident.jpg"
keywords: ["Flydubai", "IsraelFlights", "AviationSafety", "TelAviv", "DubaiAirline"]
---

# അനിഷ്‌ട സംഭവങ്ങൾക്ക് പിന്നാലെ ഇസ്രയേലിലേക്കുള്ള എല്ലാ സർവീസുകളും നിർത്തി ഫ്ലൈദുബായ്

> **Lead Summary:** ദുബായ്: ദുബായിൽ നിന്ന് ടെൽ അവീവിലേക്കുള്ള വിമാനത്തിലെ അനിഷ്ട സംഭവങ്ങൾക്ക് പിന്നാലെ ഇസ്രയേലിലേക്കുള്ള മുഴുവൻ വിമാനവും ഫ്ലൈദുബായ് നിർത്തിവച്ചു. സുരക്ഷയാണ് പ്രധാനം എന്ന് വ്യക്തമാക്കിക്കൊണ്ടാണ് ഫ്ലൈദുബായ് വിമാന സർവീസുകൾ നിർത്തിവച്ചത്.

## Article Content

ദുബായ്: ദുബായിൽ നിന്ന് ടെൽ അവീവിലേക്കുള്ള വിമാനത്തിലെ അനിഷ്ട സംഭവങ്ങൾക്ക് പിന്നാലെ ഇസ്രയേലിലേക്കുള്ള മുഴുവൻ വിമാനവും ഫ്ലൈദുബായ് നിർത്തിവച്ചു. സുരക്ഷയാണ് പ്രധാനം എന്ന് വ്യക്തമാക്കിക്കൊണ്ടാണ് ഫ്ലൈദുബായ് വിമാന സർവീസുകൾ നിർത്തിവച്ചത്.

180 യാത്രക്കാരുമായി ടെൽ അവീവിലേക്ക് പോയ വിമാനത്തിൻ്റെ കോക്‌പിറ്റിൽ വച്ച് പൈലറ്റിനെ സഹപൈലറ്റ് കുത്തുകയും വിമാനം ഇസ്രായേലിലേക്ക് ഇടിച്ചിറക്കാൻ ശ്രമിക്കുകയുമായിരുന്നു.

കോക്പിറ്റിനുള്ളിൽ ക്യാപ്റ്റൻ സ്മിത് മച്ചാറിനെ വെച്ച് ഒമാനി സ്വദേശിയായ സഹപൈലറ്റ് മൂർച്ചയേറിയ ആയുധം ഉപയോഗിച്ച് ആക്രമിക്കുകയും വിമാനത്തിന്റെ നിയന്ത്രണം ഏറ്റെടുത്ത് തകർക്കാൻ ശ്രമിക്കുകയുമായിരുന്നു.

പരിക്കേറ്റിട്ടും ആക്രമണത്തെ ശക്തമായി പ്രതിരോധിച്ച സ്മിത് മച്ചാർ, കോക്പിറ്റ് വാതിൽ തുറക്കാനുള്ള മെക്കാനിസം പ്രവർത്തിപ്പിക്കുകയും യാത്രക്കാരുടെ സഹായം അഭ്യർത്ഥിക്കുകയും ചെയ്തു. വാതിൽ തുറന്നതോടെ തൊട്ടടുത്തുള്ള സീറ്റുകളിലുണ്ടായിരുന്ന യാത്രക്കാരും ജീവനക്കാരും കോക്പിറ്റിലേക്ക് ഇരച്ചുകയറി സഹപൈലറ്റിനെ കീഴ്പ്പെടുത്തുകയായിരുന്നു.

തുടർന്ന് വിമാനത്തിലുണ്ടായിരുന്ന മറ്റ് ഓഫ്-ഡ്യൂട്ടി പൈലറ്റുമാർ വിമാനത്തിന്റെ നിയന്ത്രണം ഏറ്റെടുക്കുകയും സൗദി അറേബ്യയിലെ തബൂക്ക് വിമാനത്താവളത്തിൽ വിമാനം സുരക്ഷിതമായി അടിയന്തര ലാൻഡിംഗ് നടത്തുകയും ചെയ്തു.

പരിക്കേറ്റ സ്മിത് മച്ചാറിനെ ഉടൻ തന്നെ ആശുപത്രിയിൽ പ്രവേശിപ്പിച്ചു. നിലവിൽ അദ്ദേഹത്തിന്റെ ആരോഗ്യനില തൃപ്തികരമാണെന്ന് അധികൃതർ അറിയിച്ചു. ക്യാപ്റ്റൻ സ്മിത് മച്ചാറിന്റെ അസാമാന്യ ധീരതയെ ഇന്ത്യൻ പ്രധാനമന്ത്രി നരേന്ദ്ര മോദിയും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും പ്രശംസിച്ചു.

മഹാദുരന്തം ഒഴിവാക്കിയ യഥാർത്ഥ നായകൻ എന്നാണ് മോദി അദ്ദേഹത്തെ വിശേഷിപ്പിച്ചത്. 9/11 മോഡൽ ഭീകരാക്രമണത്തിന് സമാനമായ ഒരു വൻ അപകടമാണ് ക്യാപ്റ്റന്റെയും യാത്രക്കാരുടെയും മനസാന്നിധ്യം കൊണ്ട് ഒഴിവായതെന്ന് നെതന്യാഹു പറഞ്ഞു.

മുമ്പ് ഇന്ത്യയിലെ സ്പൈസ്ജെറ്റിൽ 10 വർഷത്തിലധികം സേവനമനുഷ്ഠിച്ചിട്ടുള്ള വ്യക്തിയാണ് മുംബൈ സ്വദേശിയായ സ്മിത് മച്ചാർ. നിലവിൽ യു.എ.ഇ ആസ്ഥാനമായുള്ള ഫ്ലൈദുബായിൽ പ്രവർത്തിച്ചു വരികയാണ്.

സംഭവത്തിൽ സമഗ്രമായ സുരക്ഷാ അന്വേഷണം പുരോഗമിക്കുകയാണെന്നും യാത്രക്കാരുടെയും ജീവനക്കാരുടെയും സുരക്ഷയ്ക്കാണ് തങ്ങൾ ഏറ്റവും മുൻഗണന നൽകുന്നതെന്നും ഫ്ലൈദുബായ് വ്യക്തമാക്കി.

Flydubai has suspended all flights to Israel following a serious in-flight incident on a Dubai–Tel Aviv service. The airline said passenger and crew safety remains its top priority as a full security investigation continues.

### Related Links & Sources
- [Original Story Source](https://gcc.truevisionnews.com/news/385280/flydubai-suspends-israel-services-incident)