---
title: "ഭാവിയുടെ മ്യൂസിയത്തിന്​ ഒരു വയസ്​; സന്ദർശിച്ചത്​ 10 ലക്ഷം പേർ "
english_title: "Museum of the future turns one year old; 10 lakhs visited"
publisher: "gccnews.in"
canonical_url: "https://gcc.truevisionnews.com/news/98903/museum-of-the-future-turns-one-year-old-10-lakhs-visited"
published_at: "2023-02-22T19:03:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/63f61a4917f2d_gcc4.jpg"
keywords: []
---

# ഭാവിയുടെ മ്യൂസിയത്തിന്​ ഒരു വയസ്​; സന്ദർശിച്ചത്​ 10 ലക്ഷം പേർ 

> **Lead Summary:** **ദുബൈ:** ഭൂമിയിലെ ഏറ്റവും മനോഹരമായ കെട്ടിടം എന്ന ടാഗ്​ലൈനോടെ അവതരിച്ച ദുബൈ മ്യൂസിയം ഓഫ്​ ഫ്യൂച്ചറിന്​ ഇന്ന്​ ഒരു വയസ്സ്​. കഴിഞ്ഞ വർഷം ഫെബ്രുവരി 22ന്​ തുറന്നുകൊടുത്ത മ്യൂസിയത്തിലേക്ക്​ ഇതുവരെ എത്തിയത്​ 10 ലക്ഷം സന്ദർശകരാണ്​. ​163 രാജ്യങ്ങളിൽ നിന്നുള്ള സന്ദർശകർ ഇവിടെയെത്തി.

## Article Content

**ദുബൈ:** ഭൂമിയിലെ ഏറ്റവും മനോഹരമായ കെട്ടിടം എന്ന ടാഗ്​ലൈനോടെ അവതരിച്ച ദുബൈ മ്യൂസിയം ഓഫ്​ ഫ്യൂച്ചറിന്​ ഇന്ന്​ ഒരു വയസ്സ്​. കഴിഞ്ഞ വർഷം ഫെബ്രുവരി 22ന്​ തുറന്നുകൊടുത്ത മ്യൂസിയത്തിലേക്ക്​ ഇതുവരെ എത്തിയത്​ 10 ലക്ഷം സന്ദർശകരാണ്​. ​163 രാജ്യങ്ങളിൽ നിന്നുള്ള സന്ദർശകർ ഇവിടെയെത്തി.

ഇതിന്​ പുറമെ ആയിരത്തോളം അന്താരാഷ്ട്ര പ്രതിനിധികളും മന്ത്രിമാരും ഉദ്യോഗസ്ഥരും വിദഗ്ധരും പ്രത്യേക അതിഥികളായി ഫ്യൂച്ചർ മ്യൂസിയം സന്ദർശിച്ചു.

180ഓളം ലോകസമ്മേളനങ്ങൾ നടന്നു. സാ​ങ്കേതികവിദ്യ, സാമ്പത്തികം, വ്യവസായം, ബഹിരാകാശം, വിനോദസഞ്ചാരം, സംസ്കാരം എന്നിവയുമായി ബന്ധപ്പെട്ടായിരുന്നു പരിപാടികൾ. ദക്ഷിണകൊറിയ, എസ്തോണിയ, ലക്സംബർഗ്​, ചൈന, ഗ്രീസ്​, ഹോങ്കോങ്​, തായ്​ലൻഡ്​, റുവാണ്ട, മൊറീഷ്യസ്​ എന്നിവിടങ്ങളി​ലെ 10 സർക്കാർ തലവന്മാരും പ്രതിനിധികളും എത്തി.

ആഗോളതലത്തിലുള്ള സ്ഥാപനങ്ങളുടെയും വ്യവസായ മാഗസിനുകളുടെയും 10 അന്താരാഷ്​ട്ര അവാർഡ്​ സ്വന്തമാക്കി. ലീഡ്​ പ്ലാറ്റിനം സ്റ്റാറ്റസും നേടി.

ലോകത്തിന്‍റെ വിവിധ ഭാഗങ്ങളിലെ 200ഓളം മാധ്യമപ്രവർത്തകർ എത്തുകയും വാർത്തകൾ ചെയ്യുകയും ചെയ്തു. 2015ലാണ്​ ഫ്യൂച്ചർ മ്യൂസിയം പ്രഖ്യാപിച്ചത്​. യു.എ.ഇയിലെ തന്നെ ഏറ്റവും തിരക്കേറിയ ​ഹൈവേയായ ശൈഖ്​ സായിദ്​ റോഡിന്​ സമീപം എമിറേറ്റ്​സ്​ ടവറിന്​​ അടുത്തായാണ്​ മ്യൂസിയം സ്​ഥിതി ചെയ്യുന്നത്​.

യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമിന്‍റെ കവിതയാണ്​ കാലിഗ്രഫി രൂപത്തിൽ ഫ്യൂച്ചർ മ്യൂസിയത്തെ പൊതിഞ്ഞിരിക്കുന്നത്​. 2016ൽ നിർമാണം തുടങ്ങിയ ഫ്യൂച്ചർ മ്യൂസിയത്തിലെ അറബിക്​ കാലിഗ്രഫിക്ക്​ 14,000 മീറ്റർ നീളമുണ്ട്​. ഏഴുനില കെട്ടിടത്തിന്​ 77 മീറ്ററാണ്​ ഉയരം.

ഇതിൽ 17,600 ചതുരശ്ര മീറ്ററും സ്റ്റീലാണ്​. 14 കിലോമീറ്റർ നീളത്തിൽ എൽ.ഇ.ഡി ലൈറ്റുകളുണ്ട്​. എക്സിബിഷൻ, ഇമ്മേഴ്‌സിവ് തിയറ്റർ തുടങ്ങിയവ സംയോജിപ്പിച്ച ​സംവിധാനമാണ്​ കെട്ടിടത്തിനകത്ത്​​.

ഏഴു നിലകളുള്ള ഉൾഭാഗം സിനിമ സെറ്റുപോലെ താമസിക്കാനും പങ്കുവെക്കാനും സംവദിക്കാനും കഴിയുന്ന സ്ഥലമായാണ്​ നിർമിച്ചിരിക്കുന്നത്​.

മൂന്നു നിലകളിലെ എക്‌സിബിഷനിൽ ബഹിരാകാശ സഞ്ചാരം, എക്കോസിസ്റ്റം, ബയോ എൻജിനീയറിങ്​, ആരോഗ്യം, ആത്മീയത എന്നീ കാര്യങ്ങൾ വിഷയമായി വരുന്നുണ്ട്​. വൃത്താകൃതിയിലുള്ള കെട്ടിടത്തിന്‍റെ രൂപം മനുഷ്യത്വത്തെയും താഴ്​ഭാഗത്തെ പച്ചനിറത്തിലെ ഭാഗം ഭൂമിയെയും ഒഴിഞ്ഞഭാഗം വരാനിരിക്കുന്ന അജ്ഞാതമായ ഭാവിയെയും പ്രതിനിധാനം ചെയ്യുന്നു. ​

149 ദിർഹമാണ്​ ടിക്കറ്റ്​ നിരക്ക്​. നിശ്ചയദാർഢ്യ വിഭാഗം, മൂന്നു​ വയസ്സിൽ താഴെയുള്ളവർ, 60 പിന്നിട്ട ഇമാറാത്തി പൗരന്മാർ, അവരെ പരിചരിക്കുന്നവർ എന്നിവർക്ക്​ പ്രവേശനം സൗജന്യമാണ്​.

ഫ്യൂച്ചർ മ്യൂസിയത്തിന്‍റെ പ്രധാന ഹാളിലേക്ക്​ കയറുന്നതിന്​ ടിക്കറ്റ്​ ആവശ്യമില്ല. ടിക്കറ്റുകൾ museumofthefuture.ae/en/book എന്ന വെബ്​സൈറ്റ്​ വഴി മുൻകൂട്ടി രജിസ്റ്റർ ചെയ്യണം.

### Related Links & Sources
- [Original Story Source](https://gcc.truevisionnews.com/news/98903/museum-of-the-future-turns-one-year-old-10-lakhs-visited)