ജിദ്ദ: (gcc.truevisionnews.com) സൗദി അറേബ്യയുടെ വടക്കൻ അതിർത്തികളിൽ കാഴ്ചയുടെ വിരുന്നൊരുക്കി സാംലുക്ക് പൂക്കൾ. വംശനാശം നേരിടുന്ന ഈ കാട്ടുപൂക്കൾ ആരെയും ആകർഷിക്കുന്ന ഏറ്റവും മനോഹരമായ പൂക്കളാണ്.
മരുഭൂമിയിലെ സുവർണ പുഷ്പമെന്നറിയപ്പെടുന്ന ഇവയുടെ ശാസ്ത്രീയ നാമം സനീഷിയോ ഗ്ലാക്കസ് എന്നാണ്. മരുഭൂമിയുടെ മനോഹാരിത വർധിപ്പിക്കുന്ന ഈ പൂക്കൾക്ക് പുനരുജ്ജീവനം നൽകുകയാണ് അധികൃതരുടെ ലക്ഷ്യം. പ്രാദേശികമായി നുവൈർ അല്ലെങ്കിൽ യെല്ലോ അറേബ്യൻ എന്നറിയപ്പെടുന്ന സാംലുക്ക് അതിവേഗം വളരുന്ന ഒരു സസ്യമാണ്.
നല്ലൊരു മഴ പെയ്താൽ ഏകദേശം 20 സെൻ്റീമീറ്റർ വരെ ഉയരത്തിൽ വളരും. നീളമുള്ള റിബൺ പോലെയുള്ള ഇലകളും തിളക്കമുള്ള മഞ്ഞ പൂക്കളുമാണ് സാംലുക്കിന്റേത്.
തേനീച്ചകളെയും ചിത്രശലഭങ്ങളെയും ആകർഷിക്കുന്ന വ്യതിരിക്തമായ സുഗന്ധമാണ് ഇവയുടേത്. പാരിസ്ഥിതിക സന്തുലിതാവസ്ഥ നിലനിർത്തുന്നതിൽ സുപ്രധാന പങ്ക് വഹിക്കുന്ന ചെടിയാണിത്.
ശൈത്യകാലത്തിൻ്റെ അവസാനം മുതൽ വസന്തകാലം വരെയാണ് സാംലുക്ക് പുഷ്പിക്കുന്നത്. പ്രദേശത്തിൻ്റെ സ്വാഭാവിക സസ്യങ്ങളുടെ ആവരണത്തിന് സംഭാവന നൽകുന്നുണ്ട്. മണ്ണിൻ്റെ ഫലഭൂയിഷ്ഠതയെ പിന്തുണയ്ക്കുകയും മണ്ണൊലിപ്പ് തടയുകയും ചെയ്യുന്നതോടൊപ്പം കന്നുകാലികൾക്കും പരാഗണം നടത്തുന്നവർക്കും ഭക്ഷണ സ്രോതസ് കൂടിയാണിത്.
പാരിസ്ഥിതിക വെല്ലുവിളികൾ സാംലുക്കിന്റെ നിലനിൽപ്പിന് ഭീഷണിയാണ്. ഈ പാരിസ്ഥിതിക സമ്പത്ത് സംരക്ഷിക്കുന്നതിനായി പരിസ്ഥിതി അധികാരികൾ വന്യ സസ്യങ്ങളെ സംരക്ഷിക്കേണ്ടതിൻ്റെയും പ്രദേശത്തിൻ്റെ ജൈവവൈവിധ്യം സംരക്ഷിക്കുന്നതിൻ്റെയും പ്രാധാന്യത്തെക്കുറിച്ച് അവബോധം വളർത്തുന്നതിന് പ്രവർത്തിക്കുന്നുണ്ട്.
ഭാവി തലമുറകൾക്ക് സൗദി അറേബ്യയുടെ സുവർണ്ണ മരുഭൂമി പുഷ്പത്തിൻ്റെ സൗന്ദര്യം തുടർന്നും കാണാൻ കഴിയുമെന്നാണ് ഇതിലൂടെ ഉറപ്പാക്കുന്നത്.
#Zamluq #flowers #create #feast #eyes #SaudiArabia #northern #borders
_(4).jpeg)
