#Kerala Pension #Social Security Pension #Kerala Government #Pension Distribution #1095 Crore
തിരുവനന്തപുരം: ( www.truevisionnews.com) സംസ്ഥാനത്തെ 51 ലക്ഷത്തിലധികം പേർക്ക് ആശ്വാസമായി ജൂലൈ മാസത്തെ സാമൂഹ്യ സുരക്ഷാ പെൻഷൻ വിതരണം ഇന്ന് മുതൽ. പെൻഷൻ വിതരണത്തിനായി 1095 കോടി രൂപ സർക്കാർ അനുവദിച്ചതായി മുഖ്യമന്ത്രി അറിയിച്ചു.സംസ്ഥാനത്ത് നിലവിൽ 51,11,908 പേരാണ് വിവിധ സാമൂഹ്യ സുരക്ഷാ പെൻഷനുകൾ വാങ്ങുന്നത്.
വാർധക്യ, വിധവ, ഭിന്നശേഷി പെൻഷനുകൾ ഉൾപ്പെടെയുള്ളവ ഇതിൽ ഉൾപ്പെടും. ഇതുകൂടാതെ ദേശീയ സാമൂഹ്യ സഹായ പദ്ധതി പ്രകാരം 8,46,456 പേർക്കും പെൻഷൻ ലഭിക്കുന്നുണ്ട്.അടുത്ത മാസം മൂന്നാം തീയതിക്ക് മുൻപ് എല്ലാ ഗുണഭോക്താക്കൾക്കും പെൻഷൻ വിതരണം പൂർത്തിയാക്കണമെന്നാണ് സർക്കാരിന്റെ നിർദേശം.
സഹകരണ ബാങ്കുകൾ, പോസ്റ്റ് ഓഫീസുകൾ, ബാങ്കുകൾ എന്നിവ വഴിയാണ് തുക വിതരണം ചെയ്യുന്നത്.അതേസമയം പെൻഷൻ മുടങ്ങാതെ നൽകുന്നതിന് മുൻ സർക്കാരിന്റെ കാലത്ത് രൂപീകരിച്ച പ്രാഥമിക സഹകരണ സംഘങ്ങളുടെ കൺസോർഷ്യം സഹകരണ വകുപ്പ് കഴിഞ്ഞ ദിവസം പിരിച്ചുവിട്ടു.
പെൻഷൻ കമ്പനിക്ക് വായ്പയായി തുക സമാഹരിക്കുന്നതിനാണ് ഈ കൺസോർഷ്യം ഉണ്ടാക്കിയത്. 9 ശതമാനം പലിശയിൽ 3000 കോടി രൂപ സമാഹരിക്കുക എന്നതായിരുന്നു ലക്ഷ്യം. എന്നാൽ 1325 കോടി രൂപ മാത്രമാണ് സമാഹരിക്കാനായത്. സർക്കാരിൽ നിന്ന് തുക തിരികെ കിട്ടുന്നതിൽ കാലതാമസമുണ്ടെന്ന് സഹകരണ സംഘങ്ങൾ പരാതിപ്പെട്ടിരുന്നു.
ഈ സാഹചര്യത്തിൽ പുതിയ കൺസോർഷ്യത്തിനുള്ള സാധ്യതകൾ യുഡിഎഫ് സർക്കാർ പരിശോധിക്കുന്നുണ്ട്. നിരവധി കുടുംബങ്ങളുടെ ഏക വരുമാന മാർഗമാണ് സാമൂഹ്യ സുരക്ഷാ പെൻഷൻ. അതിനാൽ കൃത്യസമയത്ത് വിതരണം ഉറപ്പാക്കുമെന്ന് മന്ത്രിമാർ വ്യക്തമാക്കി.
Content Highlight: Kerala Social Security Pension July Distribution Started For 51 Lakh Beneficiaries
#Kerala Pension #Social Security Pension #Kerala Government #Pension Distribution #1095 Crore
